Programi i ditës
Madhësia e tekstit
Radioja Kombëtare Bullgare © 2025 Të gjitha të drejtat janë të rezervuara

Të rinjtë bullgarë janë gjithnjë e më mosbesues, por janë pragmatikë dhe të prirur ndaj demokracisë

Bixhozi po shfaqet si një problem gjithnjë e më i madh për komunitetin

Foto: pixabay

Të rinjtë bullgarë nuk janë një shoqëri apatike apo e radikalizuar, por megjithatë po bëhen gjithnjë e më të pasigurt për perspektivat e tyre në fusha të ndryshme të jetës – kjo duket qartë nga një studim mbi të rinjtë në vendin tonë, të cilin një grup studiuesish e realizuan me mbështetjen e Fondacionit "Friedrich Ebert", si pjesë e një studimi evropian në 11 shtete të Evropës Juglindore.

Sipas tyre, studimi i qëndrimeve midis bullgarëve të moshës 14 deri në 29 vjeç është jashtëzakonisht sfidues për shkak se kjo grupmoshë nuk është homogjene, por përmban dy apo tre breza që nuk kanë pothuajse asgjë të përbashkët me njëri-tjetrin. Megjithatë, studimi i kryer me 9 mijë persona paraqet një pamje interesante:
Boris Popivanov
“Nëse ka një lajm të mirë, ai është se të rinjtë bullgarë në një masë të madhe nuk janë as antidemokratikë, as antievropianë, dhe as apatikë nga ana sociale apo të radikalizuar, por duhet të theksoj disa prirje në të gjitha fushat ku realizohet një i ri – shpjegon politologu Boris Popivanov gjatë konferencës për shtyp për prezantimin e të dhënave të studimit. – Vërehet një pasiguri gjithnjë e më e madhe midis të rinjve, të cilët janë gjithnjë e më të paqartë për perspektivat e tyre në fusha të ndryshme, një tendencë drejt individualizmit më të theksuar në dëm të kolektivizmit. Së treti, vihet re një mosbesim dhe skepticizëm në rritje ndaj gjithçkaje – si ndaj institucioneve, ashtu edhe ndaj vetë brezit të tyre, të cilit i përkasin.”
Prof. Asoc. Dr. Boris Popivanov, Dr. Përvan Simeonov dhe Stefan Georgiev në konferencën për shtyp
Ekziston edhe një tendencë drejt një pragmatizmi më të madh, jo aq nga pikëpamja e rrugëve afatgjata të karrierës apo jetës, sesa në gjetjen e zgjidhjeve funksionale në momentin e tanishëm. Dhe një tjetër prirje interesante – tek të rinjtë vërehet më shumë spontanitet. Vendimet merren në momentin e fundit, duke lënë të gjitha mundësitë e hapura, çka e lë në plan të dytë ndërtimin e planeve të qëndrueshme jetësore apo të karrierës.

Sociologu Përvan Simeonov vë theksin te izolimi shoqëror, getoizimi dhe qasja e pabarabartë ndaj mirëqenies dhe cilësisë së jetës – probleme gjithnjë e më serioze me të cilat përballen të rinjtë bullgarë në përditshmërinë e tyre.
Përvan Simeonov
"Vërejmë gjithashtu një shtyrje të vazhdueshme të momentit për të lindur fëmijë dhe për t'u larguar nga shtëpia e prindërve. Ajo që është shqetësuese është se një nga faktorët kryesorë për këtë shtyrje në kohë është faktori financiar. Do të doja të theksoja edhe modelin me dy fëmijë, i cili është deklaruar si i preferuar nga 64% e të anketuarve, por ky mendim është më tepër deklarativ, ndërsa praktika tregon se ka një rikthim drejt modelit me një fëmijë. Këta janë faktorë që pasqyrojnë përmasat e situatës demografike në të cilën ndodhet vendi."

Të anketuarit, mbi 9000 të rinj, iu përgjigjen një sërë pyetjesh të lidhura me tema si arsimi, lëvizshmëria, qëndrimet ndaj emigracionit, gatishmëria për të marrë pjesë në nisma qytetare dhe vullnetarizëm, qëndrimet ndaj krijimit të familjes, etj. Të rinjtë po ndryshojnë - konstaton sociologu Stefan Georgiev.
Stefan Georgiev
"Që nga viti 2019, kur u publikua raporti nga një studim i mëparshëm i ngjashëm, duket sikur kanë kaluar disa epoka historike me shpejtësi të madhe – luftëra, pandemi dhe, në kontekstin e studimit bullgar, një seri qeverish të shoqëruara me paqëndrueshmëri politike. Mund të themi se ka një interes të përgjithshëm në rritje për politikën si temë, por kjo nuk do të thotë se të rinjtë votojnë më shpesh. Përkundrazi – ata janë skeptikë, dhe një nga arsyet është se nuk e shohin elitën aktuale politike të mbrojë interesat e tyre – kjo është shumë e dukshme nga të dhënat."

Ndër çështjet e studiuara është edhe qëndrimi ndaj lojërave të fatit – një temë që po bëhet gjithnjë e më e ndjeshme për shkak të mesazheve reklamuese të shumta që promovojnë këtë aktivitet. Aty janë konstatuar tendenca shqetësuese:

"Dua të bëj një sqarim që ne nuk mund të bënim një pyetje të tillë të drejtpërdrejtë: – Prandaj i pyetëm në lidhje me bashkëmoshatarët e tyre, kështu që pyetja tingëllon në këtë formë – "Përafërsisht, çfarë përqindje e të njohurve, bashkëmoshatarëve dhe miqve tuaj marrin rregullisht pjesë në ndonjë lloj aktiviteti të lojërave të fatit? " Ajo që shohim si rezultat është kjo – 5% e të anketuarve thonë: "Të gjithë bashkëmoshatarët dhe të njohurit e mi marrin rregullisht pjesë në aktivitete të lojërave të fatit", ndërsa 17% të tjerë përgjigjen: "Një pjesë shumë e madhe e të njohurve dhe bashkëmoshatarëve të mi marrin rregullisht pjesë në aktivitete të lojërave të fatit". Nëse i transpozojmë mekanikisht këto përqindje mbi numrin e përgjithshëm të të rinjve në vend, mund të themi se po flasim për një praktikë masive."

Jo më pak shqetësuese është edhe arsyeja që i shtyn ata të merren me lojërat e fatit. "Në këtë mënyrë mund të fitoj para, në vend që të kërkoj punë" – është përgjigja më e zakonshme për motivet e tyre.

Foto: BGNES, Savina Spasova (BNR), BTA,

Përgatiti në shqip dhe publikoi: Kostandina Bello



Последвайте ни и в Google News Showcase, за да научите най-важното от деня!

Më shumë nga rubrika

Ngjarjet me adresë ballkanike

Vazhdojnë protestat në Turqi pas arrestimit të kryebashkiakut të Stambollit  Protestat masive në Turqi nuk janë qetësuar që nga arrestimi i kryebashkiakut të Stambollit Ekrem Imamoglu më 19 mars. Gati 1900 persona u arrestuan për pjesëmarrje në..

botuar më 25-03-29 8.30.PD

81% e bullgarëve janë të mendimit se Kuvendi Popullor i emëron anëtarët e tij mbi baza partiake

Kriza parlamentare në Bullgari ka vonuar për muaj të tërë procedurat për zgjedhjen e drejtuesve të organeve rregullatore kryesore si Komisioni Rregullator i Energjisë dhe Shërbimeve të Ujit, Gjykata Kushtetuese, etj. Pasi u formua një shumicë qeverisëse,..

botuar më 25-03-28 7.30.PD
Marin Marinov

Presidenti Rumen Radev i bëri thirrje qeverisë që të mbajë një qëndrim të qartë për vdekjen e Marin Marinov në Gaza

Presidenti Rumen Radev i bëri thirrje qeverisë që të mbajë një qëndrim të qartë dhe proaktiv për rastin e punonjësit bullgar të OKB-së, Marin Marinov, i cili vdiq në Rripin e Gazës. "Shoqëria jonë pret që ajo të tregojë se është e shqetësuar për..

botuar më 25-03-27 3.04.MD