Evakuimi i qytetarëve bullgarë dhe të huaj nga Izraeli u planifikua me kujdes nga diplomatët tanë në Sofje dhe ata në terren, njoftoi Kryeministri Rosen Zheljazkov në fillim të mbledhjes së qeverisë, raportoi gazetarja e BNR-së Cvetelina Stojanova. Herët këtë mëngjes, 148 persona, nga të cilët 89 janë bullgarë, mbërritën në Aeroportin “Vasill Levski” të Sofjes.

• Ministria e Jashtme Bullgare arriti të evakuojë 148 persona nga Izraeli 

“Qytetarë, punonjës, njerëz nga të gjitha profesionet, si dhe diplomatë - dua të falënderoj veçanërisht Ministrinë e Jashtme, si dhe diplomatët bullgarë, shërbimet bullgare”, tha Kryeministri.

Ministri i Jashtëm Georg Georgiev shpjegoi se rruga nga Izraeli nëpërmjet Egjiptit ishte e preferuar në vend të asaj nëpërmjet Jordanisë.

“Siguria ishte shumë e rëndësishme, sepse bombardimet po ndodhin në territorin izraelit dhe ne duhej të garantonim rrugën më të sigurt të mundshme për automjetet me të evakuuarit”, tha Ministri. Ai shtoi se linjat telefonike të emergjencës dhe qendra e koordinimit vazhdojnë të punojnë për ata që kanë nevojë për ndihmë “në këtë situatë shumë të ndërlikuar që ne do të vazhdojmë ta monitorojmë”.

Redaktoi: Diana Cankova

Përgatiti në shqip dhe publikoi: Vesella Mançeva