Dega e Universitetit të Ruses "Angell Kënçev" në Razgrad (Bullgaria Verilindore) realizon projekte të përbashkëta shkencore, pjesëmarrje në forume të ndryshme dhe shkëmbim studentësh dhe pedagogësh me institucione të arsimit të lartë në Bullgari dhe jashtë vendit, raportoi BTA. Në vitet e fundit, pesë studentë të huaj nga Republika e Maqedonisë së Veriut dhe Kazakistani kanë kaluar nëpër Degën e Universitetit të Ruses me ndihmën e programeve "Erasmus +" dhe "Ceepus". Gjashtë studentë nga Dega në Razgrad kanë kaluar nëpër universitete të huaja në Republikën e Maqedonisë së Veriut, Kroaci, Bosnjë dhe Hercegovinë dhe Rumani në kuadër të të dyja programeve.

Koordinatorja e komunikimit institucional të institucionit arsimor në Razgrad - Ilina Ivanova, jep informacion se 27 lektorë nga Republika e Maqedonisë së Veriut, Kroacia, Rumania dhe Lituania kanë vizituar Razgradin, dhe 48 lektorë nga Dega kanë vizituar universitete të huaja në Qipro, Kazakistan, Rumani, Republikën e Maqedonisë së Veriut, Kroaci, Spanjë, Britani të Madhe, Republikën Çeke, Greqi, Bosnjë dhe Hercegovinë, Itali, Turqi, Poloni, Serbi.

Të gjitha sallat e leksioneve dhe seminareve në Degën e Universitetit të Ruses "Angell Kënçev" në Razgrad janë të pajisura me sisteme moderne prezantimi. Studentët trajnohen në tre fusha profesionale: teknologji kimike, bioteknologji dhe teknologji ushqimore dhe diplomohen me kualifikim profesional "inxhinier" në specialitetin përkatës. Specialitetet e studiuara në Razgrad janë të kërkuara për shkak të mundësive për realizim profesional në fushat e industrisë farmaceutike, bioteknologjike, ushqimore, silikate dhe qeramike.

Përpiloi: Cvetana Tonçeva

Përgatiti në shqip dhe publikoi: Vesella Mançeva

Foto: BTA, facebook.com/filialrazgrad