Bukuritë natyrore të Shqipërisë në objektivin e fotografit bullgar Nikollaj Shabarkov

botuar më 25-07-08 10.35.PD

Ambasadorja Inid Milo dhe fotografi Nikollaj Shabarkov

Ekspozita fotografike “Snapshots of Albania – A Season to Remember” vë në qendër të vëmendjes bukuritë natyrore dhe trashëgiminë kulturore të Shqipërisë, të shfaqura nëpërmjet objektivit të fotografit bullgar Nikollaj Shabarkov.

Puna e tij nuk është thjesht dokumentim vizual, por një dëshmi e lidhjes emocionale që ai ka krijuar me Shqipërinë, theksoi gjatë hapjes së këtij aktiviteti kulturoro-turistik Ambasadorja e Shqipërisë në vendin tonë SH.S.Znj. Inid Milo. “Fotografitë e tij na tregojnë Shqipërinë jo vetëm me syrin e një vizitori, por me zemrën e një miku të vërtetë,” deklaroi Ambasadorja dhe falënderoi të gjithë të pranishmit për interesin dhe mbështetjen e tyre në forcimin e marrëdhënieve miqësore mes të dy vendeve.

Ekspozita përmban 20 fotografi mbresëlënëse, të cilat paraqesin peizazhe të ndryshme të Shqipërisë: nga brigjet me ujëra të kristalta të Rivierës Shqiptare, te majat e thepisura të Alpeve shqiptare, nga qetësia e liqenit të Ohrit, deri tek qytetet historike të Gjirokastrës dhe Beratit, të mbrojtura nga UNESCO.

Fotografitë e z. Shabarkov janë realizuar me një ndjeshmëri të veçantë artistike, duke arritur të kapin dritën, ngjyrat dhe emocionet që karakterizojnë natyrën dhe kulturën shqiptare. Veçanërisht, një prej fotove të tij të realizuara në Shqipëri ka fituar çmim në konkursin ndërkombëtar “Wanderlust in Albania”, organizuar në Shqipëri, duke sjellë edhe më shumë vëmendje mbi potencialin turistik dhe natyror të Shqipërisë.

Të pranishëm në aktivitetin në Universitetin e Sofjes ishin Ambasadorë dhe diplomatë nga vende të ndryshme, përfaqësues të botës akademike, artistë, gazetarë, si dhe përfaqësues të diasporës shqiptare në Bullgari, përfshirë shoqatën “Mandrica”, e cila mban gjallë lidhjet historike dhe kulturore midis dy popujve.

Pas ceremonisë së hapjes, të ftuarit patën mundësinë të shijojnë një pritje ku u shërbyen gatime tradicionale shqiptare, një tjetër mënyrë për të sjellë më pranë kulturat e dy vendeve. Përmes aromës dhe shijes së kuzhinës shqiptare, miqtë bullgarë dhe ndërkombëtarë përjetuan një copëz nga mikpritja dhe tradita shqiptare, që, siç tha Ambasadorja Milo, është jo vetëm zakon, por mënyrë jetese në Shqipëri.

Vendi është një nga tregjet turistike me rritjen më të shpejtë në kontinent dhe ekspozita aktuale, që paraqet bukuritë e saj nëpërmjet syve të një artisti bullgar, është një ftesë e hapur për qytetarët bullgarë dhe partnerët ndërkombëtarë për të zbuluar këtë vend të Ballkanit, ku historia dhe bashkëkohësia bashkëjetojnë në harmoni.

“Shqipëria është duke u afirmuar si një ndër destinacionet më tërheqëse, autentike dhe ende të paprekura të Evropës, dhe ne duam që miqtë tanë bullgarë ta shohin e ta përjetojnë nga afër këtë vend të mrekullueshëm,” theksoi Ambasadorja Milo.

Foto: Sindi Nikollofski

Последвайте ни и в Google News Showcase, за да научите най-важното от деня!

Ndaje

Bullgaria dhe Shqipëria – më pranë se kurrë nëpërmjet artit

Bukuritë natyrore të Shqipërisë në objektivin e fotografit bullgar Nikollaj Shabarkov

Më shumë nga rubrika

Një verë, një gjuhë, shumë përvoja

5 filma me pjesëmarrje bullgare do të shfaqen në Festivalin e Filmit në Sarajevë

Festivali “Misteret Trake” na rikthen në botën mistike të fiseve të lashta

Një verë, një gjuhë, shumë përvoja