Kompania shtetërore energjetike e Ukrainës "Naftogaz" nënshkroi marrëveshjen e saj të parë me korporatën shtetërore të naftës dhe gazit të Azerbajxhanit SOCAR për import të gazit natyror përmes rrugës Transballkanike. Për herë të parë u realizua një furnizim provë me gaz përmes korridorit Bullgari–Rumani–Ukrainë, thuhet në deklaratën zyrtare të "Naftogaz", e publikuar në faqen zyrtare të kompanisë. Megjithëse sasia e furnizimit nuk është specifikuar, pala ukrainase thekson se ajo është e vogël, por me rëndësi strategjike. "Kjo është një lëvizje me vëllim të vogël, por me rëndësi strategjike, që hap rrugën për bashkëpunim afatgjatë", deklaron drejtori ekzekutiv i kompanisë ukrainase, Sergij Korecki.

Qeveria greke miratoi një investim prej qindra milionë eurosh në portin e Selanikut. Projekti është investimi më i madh në Greqinë Veriore. Qëllimi është të rriten kapacitetet e portit për përpunimin e ngarkesave dhe të kthehet në hyrjen kryesore detare drejt Evropës Juglindore. Kryetari i bashkisë së qytetit, Stelios Angeludis, komentoi se rinovimi do të krijojë 4000 vende të reja pune. Në projekt do të punojnë si specialistë grekë, ashtu edhe nga vende të tjera ballkanike.

67% e portit është në pronësi të biznesmenit rus Ivan Savvidis, i cili është gjithashtu shtetas grek. E quajnë "Cari rus i Selanikut". Ai është ish-deputet i Dumës ruse, ndërsa fëmijët e tij kanë përfunduar arsimin e lartë në Bullgari, raporton korrespondentja e BNR në Greqi, Katja Peeva.

Aktivistja suedeze për mjedisin Greta Thunberg mori pjesë në një valle proteste në këngën "Shqiponja e zezë pi ujë në Vardar" gjatë një aksioni kundër ndërtimit të një hidrocentrali në malin Kozhuf, pranë kufirit me Greqinë.

Në vendin e quajtur "Asan Çeshma", mysafirja mbështeti aktivistët lokalë të mjedisit, të cilët prej një muaji bllokojnë rrugën drejt qendrës së skive "Kozhuf", raporton gazeta “Veçer”. Autoritetet dhanë leje për ndërtimin e një hidrocentrali mbi lumin Doshnica. Ekologët protestojnë kundër investimit dhe veprimtarisë së minierave në rajon. Ata mendojnë se projektet rrezikojnë të ardhmen e rezervatit natyror në malin Kozhuf, i cili është pjesë e "Natura 2000". Thunberg refuzoi të flasë për mediat, por u shpreh për mikpritësit se i mbështet, sepse "çdo betejë kundër shkatërrimit të natyrës, sado lokale të jetë, është edhe globale".

Agjencia BTA raportoi se më 31 korrik Thunberg ka marrë pjesë në një bllokadë në lagjen Novi Beograd në kryeqytetin serb. Për "masina.rs" ajo deklaroi se po proteston kundër korrupsionit dhe shfrytëzimit të burimeve natyrore.

Në përpjekjen e 54-të dhe të fundit, parlamenti i Kosovës nuk arriti të zgjedhë kryetarin e tij, njoftoi koha.net. Më 27 korrik përfundoi afati 30-ditor i dhënë nga Gjykata Kushtetuese që parlamenti të zgjidhte kryetarin. Në fuqi hyn një ndalim i përkohshëm për deputetët për të marrë çfarëdo vendimi deri më 8 gusht. Në këtë periudhë, gjykata duhet të vendosë për fatin e parlamentit.

Pas zgjedhjeve të 9 shkurtit, Lëvizja "Vetëvendosje" e kryeministrit Albin Kurti nuk ka shumicë absolute në parlamentin e fundit në Prishtinë, por nuk tërhiqet nga kandidatura e Ministres së Drejtësisë në dorëheqje, Albulena Haxhiu, për kryetare të organit legjislativ. Parlamenti i bllokuar nuk lejon formimin e një qeverie të rregullt dhe kabineti i Kurtit mbetet përkohësisht në detyrë.

Pjesa myslimano-kroate e përbërjes së Bosnje dhe Hercegovinës miratoi ndryshime në kodin penal, me të cilat u zbatua Konventa e Stambollit, njoftoi televizioni kombëtar BHRT. Risi kyçe është futja e femicidit (“vrasje e qëllimshme e grave për shkak të gjinisë së tyre”) si një krim më vete dhe dënime më të ashpra për dhunën ndaj grave.

Ligji u miratua pasi në formulimin fillestar "jeton me një person tjetër" u shtua sqarimi "të gjinisë së kundërt". Vendimi shkaktoi reagime të ashpra nga misionet ndërkombëtare në Sarajevë, raporton media. Bashkësia ndërkombëtare paralajmëron se është humbur mundësia për të siguruar mbrojtje për të gjitha viktimat, pavarësisht nga gjinia apo orientimi seksual.

Përgatiti në shqip dhe publikoi: Sindi Nikollofski

Foto: rbc.ua, ekathimerini.com, БГНЕС, koha.net, bhrt.ba