Ivana Petkova nuk do ta harrojë kurrë leksionin e saj të parë në Gjeorgji, më 23 dhjetor 2019, me temë: "Bullgaria dhe gjuha e bullgarëve."

"Aty shpjegova se si gjuha bullgare dallohet nga gjuhët e tjera sllave," – rrëfen ajo për Radio Bullgarinë. "Në fakt, nëpërmjet teksteve letrare, studentët angazhohen me shumë interes jo vetëm me materialin e teksteve mësimore. Kështu, me mbështetjen e Ministrisë së Arsimit dhe Shkencës dhe të Universitetit të Plovdivit, ne filluam lektoratin bullgar."

Bullgaristika në Gjeorgji ekziston në formën e një seminari ku regjistrohen studentë nga të gjitha programet e studimit. Dy vite më parë – pas akreditimit të programit të studimeve "Sllavistikë" – u përfshinë edhe lëndët me zgjedhje "Gjuha bullgare bashkëkohore" dhe "Historia e letërsisë bullgare". Deri më tani, përmes këtij lektorati kanë kaluar rreth njëzet studentë, dhe shtatë prej tyre tashmë kanë marrë certifikatën e përfundimit të kursit. Një dokument të ngjashëm ata e marrin edhe në shkollat verore të gjuhës bullgare në Universitetin e Sofjes dhe në Universitetin e Veliko Tërnovos.

"Në këto seminare ndërkombëtare, studentët merren edhe me përkthim" – thotë Ivana Petkova. – "Planet tona lidhen me shkëmbime kulturore dhe me idenë për përkthimin e letërsisë gjeorgjiane dhe asaj bullgare."

Në “buqetën shumëngjyrëshe”, siç i përshkruan studentët e saj drejtuesja, përfshihen të rinj që kanë udhëtuar në Bullgari; që vijnë nga martesa të përziera; apo që kanë ambicie të zhvillohen profesionalisht në fusha të lidhura me vendin tonë. Dhe lulet më të reja në këtë buqetë janë nxënësit e shkollës bullgare “Çitalishte” pranë ambasadës sonë në Tbilisi.

"Shkolla bullgare e së dielës u hap në vitin 2017 me iniciativën e ambasadores Desisllava Ivanova dhe funksionon mbi baza vullnetare," – tregon më tej Ivana Petkova. "U quajt "Çitalishte" (Bibliotekë) për herë të parë nga gazetari Emill Spahijski – atëherë ajo vërtet i ngjante këtij lloj institucioni, pasi nuk kishte mësues profesionist. Shkolla bashkon komunitetin bullgar, dhe qëllimi i saj është të zhvillojë ndjenjën e përkatësisë ndaj atdheut, të forcojë shpirtin kombëtar si bazë për sjellje atdhedashëse te bullgarët jashtë vendit. Nxënësit janë vetëm pesë a gjashtë, pasi ka një lëvizshmëri të madhe dhe komuniteti bullgar është i vogël. Kjo është arsyeja pse "Çitalishte" nuk mund të regjistrohet në Ministrinë e Arsimit të Bullgarisë. Por ka ndodhur diçka shumë e mirë – nxënësit janë regjistruar në shkollën bullgare në Milano, nga ku mund të marrin certifikata për klasat e përfunduara.

Edhe pse në pamje të parë e padukshme, prania e Bullgarisë në aspektin arsimor dhe kulturor në Gjeorgji po merr rëndësi gjeostrategjike.

"Dialogu ndërkulturor ndikohet në mënyrë serioze nga faktorë të ndryshëm," shton Ivana Petkova. "Për të punuar me sukses në kushte të tilla, kërkohen kompetenca të veçanta që jam përpjekur t’i zhvilloj ndër vite – ndjeshmëri kulturore, njohje të vlerave dhe traditave, përshtatshmëri ndaj një mjedisi shumë delikat, mirëkuptim ndaj tjetërsisë – që shpesh bie ndesh me bindjet e tua – dhe empati."

Në këtë rrugë të vështirë, Ivana Petkova nuk është e vetme. Sipas saj, ajo mbështetet nga "engjëlli mbrojtës" i bullgaristikës në Gjeorgji – prof. Indira Xaganija, me të cilën ndajnë të njëjtin vizion: "Të prezantojmë Bullgarinë në Gjeorgji dhe të hapim mundësi më të gjera për dialog kulturor dhe shkëmbim akademik mes dy vendeve."