Gjithmonë e angazhuar me projekte të shumta, Nina Nikolina e pret vjeshtën me disa ngjarje të rëndësishme: një këngë të re, një album dhe një koncert-premierë për prezantimin e albumit. Këngëtarja shënon rikthimin e saj në muzikën pop me albumin e ri të 13-të me radhë, të titulluar "Global Pop", i cili pritet të dalë në tetor. Në këtë album nuk do të ketë këngë folklorike, por do të ketë një tingëllim folklorik – si nga Bullgaria, ashtu edhe nga pjesë të tjera të botës. Pesë prej këngëve në “Global Pop” u krijuan nga një ekip krijuesish të dëshmuar ndër vite. Muzika është e Magomed Aliev – Maga, ndërsa autorja e teksteve është Gergana Turijska – të njëjtët që qëndrojnë pas hiteve të padiskutueshme të Nina Nikolinës, si "Ti" dhe "Nuk mundem". Rikthimi i tyre si një dyshe vjen me këngën e re “Pasqyrë”. Propozimi për këtë këngë erdhi nga producenti Igor Markovski, i cili e përfshin këngën në projektin “Artistë që këndojnë”.

Nina Nikolina shpjegon pse kjo këngë është shumë e veçantë për të:

„Pasqyrë“ është ndoshta një rrëfim i sinqertë dhe një shprehje dashurie për prejardhjen dhe atdheun. Sepse në tekst ka shumë fjalë të forta që të kapin për fyt. Kur shkroi këtë tekst, Geri Turijska u ndikua nga një turne i formatit të saj “Kuti postare me tregime” në Evropë. Nga të gjitha takimet që ajo pati me bullgarët emigrantë jashtë vendit, ajo solli me vete këtë nostalgji. Ajo vetë tha se nuk është e lehtë të shkruash për Bullgarinë dhe për atë se sa i lidhur je me të dhe sa mund të jesh i lidhur. Sepse ne të gjithë jemi njerëz modernë dhe nuk e tregojmë hapur apo nuk e mbajmë këtë patriotizëm si një medalje, por ai ekziston – është rrënja që na tërheq, mbi të cilën qëndrojmë fort, për të njohur të parët tanë. Profesioni im prej kaq vitesh lidhet me folklorin, i cili vetë është i ngulitur fort në këtë drejtim. Kështu që ndoshta këtë herë në këtë këngë më me vetëdije kemi ngritur dashurinë për Atdheun.Geri Turijska ka vendosur shumë bukur fjalët në tekst, duke lënë qëllimisht disa prej tyre të duken si fjalë të veçanta – kështu që është edhe një sfidë për dëgjuesit t’i gjejnë ato.”

Videoja e këngës „Pasqyrë“ është po ashtu mbresëlënëse. Ajo u xhirua mes pamjeve madhështore të kalasë dhe shkëmbinjve të Bellogradçikut. Përveç bukurisë së Shkëmbinjve të Bellogradçikut, në video shohim Nina Nikolina të veshur me një fustan të dizajnerit të njohur Naim Kan. I mahnitur nga këngëtarja, ai i dhuroi asaj këtë veshje – pjesë e koleksionit të tij të ri, i cili është i frymëzuar nga bukuria e qëndismave tradicionale bullgare.

Më shumë për këngëtaren mund të lexoni në botimet e Radio Bullgarisë:

• Kënga popullore bullgare “Rajna” – pjesë e Projektit “Ura mes kulturave”

• “Shën Gjergji” apo “Ederlezi” – kënga pa të cilën nuk mundemi në ditën e Shën Gjergjit

• Nina Nikolina dhe kënga e saj më e re në stilin folklorik

• Nina Nikolina prezanton këngë të dëgjuara dhe të dashura me orkestrim të ri 

Përgatiti në shqip dhe publikoi: Svetllana Dimitrova

Foto: facebook.com/NinaNikolinaMusic