E lindur dhe e rritur në një familje fermerësh dhe shkrimtarësh në një fshat zviceran të lartë në mal, Elizabeth pranon se gjithmonë ëndërronte të kishte krahë për të fluturuar dhe eksploruar botën. Ajo ndoqi ëndrrën e saj, dhe sot arrin të frymëzojë udhëtarët evropianë për të zbuluar bukurinë e atdheut tonë. Por si arritën rekomandimet e saj për të vizituar Bullgarinë tek turistët e mundshëm nga këto vende?

"Falë profesionit tim dhe punës së bashkëshortit, kam një rreth jashtëzakonisht të gjerë të njohurish. Të gjithë më pyesin se çfarë bëjmë në Bullgari, vendi ku kalojmë nga tre muaj çdo vit. Kështu që fjalë për fjalë u them se çfarë mund të përjetojnë dhe eksplorojnë nëse ata vizitojnë vendin. Falë kontakteve të mia, po përpiqem gjithashtu të bind disa agjenci udhëtimesh që të ofrojnë një gamë më të gjerë paketash udhëtimi për vendin dhe jo vetëm pushime në Detin e Zi. Unë u tregoj për trashëgiminë e pasur kulturore-historike, manastiret bullgare, malet, burimet e shumta minerale dhe mundësitë për pushime spa dhe wellness", tha zviceranja për Radio Bullgarinë.

Elizabeth ka eksperiencë si psikiatre, ndërsa bashkëshorti i saj ka shumë vite që punon për të tërhequr investitorë zviceranë në Bullgari. Por sot ai nuk është më i angazhuar me këtë gjë dhe të dy jetojnë në Cyrih. Lidhja e tyre me vendin tonë mbahet gjallë falë lajmeve dhe materialeve të Radio Bullgarisë. Elizabeta dëgjon shpesh programet në gjuhën gjermane "Bulgaria Sot" që përgatisim çdo ditë jave, ku flasim për aspekte të ndryshme të jetës në Bullgari, dhe teleportojmë audiencën në rrugë interesante dhe e zhysim në shumëllojshmërinë e muzikës dhe traditave.

Këshilla befasuese e Elizabeth Blaker është që vendi ynë të mos t’i mbajë shumë shpresa tek reklamat turistike. Shpjegimi është se ka shumë shembuj të destinacioneve në Itali dhe Spanjë që përjetojnë mbiturizëm dhe për t'u përballur me të, autoritetet lokale detyrohen të vendosin kufizime dhe tarifa të ndryshme.

"Bullgaria duhet të mbetet autentike me bukurinë e saj, kuzhinën e shijshme dhe të larmishme, mikpritjen, kulturën dhe historinë e pasur siç është tani. Kjo është ajo që i tërheq njerëzit me të cilët ndërveproj dhe i predispozon ata të kthehen përsëri dhe përsëri në vend."

Foto: BTA, arkiva personale

Përgatiti në shqip dhe publikoi: Kostandina Bello