Lideri i GERB, Bojko Borisov, deklaroi për mediat se personalisht ka marrë pjesë në bisedime me përfaqësues amerikanë për heqjen e sanksioneve sipas “Magnitski” ndaj qytetarëve bullgarë. Ai tha se ka diskutuar për këtë çështje edhe me David Cameron, kur ky i fundit ishte ministër i jashtëm i Mbretërisë së Bashkuar. Sipas liderit të GERB, çështja e heqjes së sanksioneve ndaj Deljan Peevski është diskutuar shumë herë në kabinetin e tij gjatë koalicionit me liderët e PP-DB – Kirill Petkov, Asen Vasilev dhe Hristo Ivanov, raportoi gazetari i BNR-së, Daniell Inkov.

“Flas për të gjithë bullgarët që kanë rënë padrejtësisht nën këto sanksione,” sqaroi Borisov. Lideri i GERB tha se mendon se Deljan Peevski është përfshirë padrejtësisht në sanksione. “Jam i bindur se Peevski nuk ka shitur pasaporta, dhe ata që i kanë shitur, janë arrestuar”, tha Borisov, duke shtuar: “Kam marrë pjesë kur sanksionet u vendosën. Kur ato u shpallën, isha në ambasadën e SHBA-së me ambasadoren dhe Jim O’Brian dhe di gjithçka rreth këtyre sanksioneve”. Ai pohoi gjithashtu se ka biseduar me shumë nga shërbimet partnere për këtë temë.

Më vonë, në një postim në Facebook, Hristo Ivanov shkroi: “Është krejtësisht e rreme që unë kam ndihmuar për heqjen e sanksioneve ndaj Deljan Peevski.”

Lexoni më shumë nga arkivi i Radio Bullgarisë: 

• SHBA-ja shtoi bullgarë të rinj të sanksionuar në listë sipas Ligjit “Magnitsky”

• Prokuroria ndërpreu hetimet nga lista “Magnitsky” kundër Deljan Peevskit

• I doli tymi perandorisë së Deljan Peevskit

Redaktoi: Miglena Ivanova

Përgatiti në shqip dhe publikoi: Svetllana Dimitrova

Foto: BTA